Manuale në pamje, automatike në zemër
Ferrari 12Cilindri Manuale përdor një sistem të ri të quajtur Manuale By-Wire, i cili synon të rikrijojë ndjesinë e një kambioje manuale tradicionale përmes elektronikës.
Makina ka levë manuale me kanal të hapur, ashtu si Ferrari-t klasikë, si edhe pedal friksioni për ata që duan ndjesinë e vjetër mekanike. Por me shtypjen e një butoni, sistemi kthehet në një kambio automatike me dy friksione dhe 8 marshe.
Në modalitetin “manual”, makina përdor gjashtë marshet e para të kambios DCT, ndërsa dy marshet e fundit mbeten për efikasitet dhe udhëtime në autostradë. Pra, është manuale kur do ta shijosh dhe automatike kur do komoditet.
Levë manuale pa lidhje mekanike
Pjesa më interesante është se leva e marshit dhe pedali i friksionit nuk kanë lidhje mekanike direkte me kambion. Ato janë thjesht komanda elektronike që dërgojnë sinjale te sistemi i transmetimit.
Megjithatë, Ferrari thotë se ndjesia është shumë pranë një manualeje të vërtetë. Nëse drejtuesi gabon me komandat, makina mund të niset ngadalë ose madje të fiket, pikërisht për të ruajtur realizmin e eksperiencës.
Pedali i friksionit është projektuar të ketë rezistencë reale, duke imituar ndjesinë e Ferrari 599, modeli i fundit i markës me kambio manuale të vërtetë. Mekanizmi është ndërtuar nga çelik i përpunuar, për të krijuar ndjesi analoge përmes sinjaleve dixhitale.
Ferrari ka rikthyer edhe uljet e marsheve me teknikën heel-and-toe, por sistemi nuk lejon gabime të rrezikshme. Softueri e mbron motorin dhe transmetimin nga futja e një marshi të gabuar që mund të shkaktojë dëme.
V12 atmosferik me 819 kuaj fuqi
Pavarësisht debatit për kambion, ylli kryesor mbetet makina vetë. Ferrari 12Cilindri Manuale është një grand tourer i vërtetë, me linja që kujtojnë berlinettat V12 të viteve ’50.
Kofano që hapet në drejtim të kundërt dhe katër daljet e shkarkimit e bëjnë menjëherë dramatike në pamje. Nën kofano ndodhet motori atmosferik V12 6.5 litra, që prodhon 819 kuaj fuqi dhe 678 Nm fuqi tërheqëse.
Në një kohë kur shumë prodhues po kalojnë te motorët më të vegjël turbo ose te elektrifikimi total, Ferrari ka zgjedhur të mbrojë traditën. Ky V12 ngjitet deri në 9.500 rpm, duke i dhënë makinës karakter shumë të pastër mekanik.
Performanca është në nivelin që pritet nga Ferrari: 0-100 km/h realizohet për rreth 3.0 sekonda, ndërsa shpejtësia maksimale kalon 340 km/h.
Vetëm 1.499 njësi dhe çmim për koleksionistë
Kabina ruan atmosferën klasike Ferrari, me levën metalike të vendosur në qendër të konsolës. Struktura prej alumini rreth saj është frymëzuar nga forma e një piruni akordimi, ndërsa komandat dytësore janë integruar në mënyrë elegante.
Klientët mund ta personalizojnë interiorin me lëkurë ekskluzive, Alcantara dhe sedilje Comfort ose Racing. Të dyja llojet e sediljeve kanë gjashtë vijëzime vertikale, si referencë ndaj konfigurimit me gjashtë marshe në modalitetin manual.
Ferrari do të prodhojë vetëm 1.499 njësi të 12Cilindri Manuale. Ky numër nuk është zgjedhur rastësisht, por lidhet me cilindratën 1.499 cc të motorit të parë V12 të kompanisë, të prezantuar në vitin 1947.
Makina mund të porositet në 25 ngjyra historike Ferrari, përfshirë Rosso Rubino, Rosso Dino, Blu Pozzi dhe Nero Daytona.
Çmimi është po aq ekskluziv sa vetë makina: 12Cilindri Manuale kushton 590.000 euro, ndërsa versioni standard me kambio normale kushton rreth 400.000 euro.
Në fund, 12Cilindri Manuale është një Ferrari që hap debat. Nuk është manuale e vërtetë në kuptimin klasik, por përpiqet të ruajë ndjesinë e saj në një botë gjithnjë e më dixhitale. Për disa do të jetë e ardhmja. Për të tjerë, një kompromis i panevojshëm. Por një gjë është e sigurt: askush nuk do ta injorojë.