Toyota po hyn në një territor krejt të ri me prezantimin e GR GT, supercar-makinës së parë të epokës moderne të Gazoo Racing. Modeli i ri do të qëndrojë në krye të familjes GR, aty ku sot bëjnë pjesë modele si GR Yaris, GR Corolla, GR 86 dhe GR Supra.
GR GT, së bashku me versionin garues GR GT3, ndjekin rrugën e modeleve historike si Toyota 2000GT dhe Lexus LFA. Qëllimi është i qartë: të ofrohet një eksperiencë sa më e pastër drejtimi, me fokus te qendra e ulët e gravitetit, aerodinamika efikase, pesha e kontrolluar dhe ngurtësia e lartë strukturore.
Toyota thekson se zhvillimi i këtij modeli është bërë me filozofinë e Gazoo Racing: të ndërtohen makina gjithnjë e më të mira, duke përdorur njohuritë që vijnë drejtpërdrejt nga motorsporti.
Shasi alumini dhe peshë e kontrolluar
Toyota GR GT bazohet në një shasi krejtësisht të re prej alumini. Për të ulur sa më shumë peshën, pjesa më e madhe e paneleve të karrocerisë është ndërtuar me material plastik të përforcuar me fibra karboni.
Falë kësaj zgjidhjeje, pesha e makinës mbahet në rreth 1.750 kg, një shifër e rëndësishme për një super-makinë me përmasa të mëdha dhe motor V8.
GR GT ka gjatësi 4.82 metra, gjerësi 2 metra dhe lartësi vetëm 1.19 metra, ndërsa baza e rrotave është 2.72 metra. Këto përmasa i japin makinës një profil shumë të ulët dhe agresiv.
Në dizajn, GR GT duket qartë si një makinë performance. Hyrjet e mëdha të ajrit, fenerët e mprehtë, kapaku i gjatë dhe linjat e tensionuara krijojnë një pamje shumë më radikale se çdo model tjetër Toyota.
Pamje agresive dhe detaje tipike super-makine
Në pjesën e pasme, karakteri sportiv bëhet edhe më i dukshëm. Dy daljet dyshe të shkarkimit dhe kanalet aerodinamike tregojnë menjëherë se GR GT nuk është thjesht një model i bukur, por një makinë e ndërtuar për performancë serioze.
Rrotat janë 20 inç dhe kombinohen me goma 265/35 përpara dhe 325/30 mbrapa, duke theksuar konfigurimin sportiv me lëvizje nga rrotat e pasme.
Pas tyre ndodhet një sistem frenimi karbon-qeramik, i krijuar për të përballuar ritme të larta dhe përdorim intensiv. Kjo është një zgjidhje që i shkon natyrës së modelit, pasi GR GT është menduar jo vetëm për rrugë, por edhe për performancë të nivelit të pistës.
Me këtë dizajn, Toyota kërkon të tregojë se GR GT nuk është thjesht pasardhës shpirtëror i Lexus LFA, por një model me identitet të vetin në botën e super-makinave moderne.
Kabinë që nuk ngjan me asnjë Toyota tjetër
Brenda, GR GT largohet plotësisht nga çdo gjë që jemi mësuar të shohim te modelet tradicionale të Toyota-s. Kabina ka atmosferë të pastër super-makine, me fokus të qartë te drejtuesi.
Materialet janë premium, me kombinim të lëkurës së kuqe dhe Alcantara në pjesë të ndryshme të interierit. Pas timonit GR ndodhet një panel i ri digjital instrumentesh, i krijuar për t’i dhënë drejtuesit informacionet kryesore në mënyrë të shpejtë dhe të qartë.
Në konsolën qendrore ndodhet edhe një ekran tjetër për sistemin e informacionit dhe argëtimit. Megjithatë, fokusi kryesor i kabinës mbetet drejtimi, jo luksi i tepruar.
Toyota duket se ka dashur të krijojë një ambient që lidhet më shumë me garat dhe me ndjesinë e kontrollit, sesa me komoditetin klasik të një GT-je të rëndë.
Motor V8 twin-turbo dhe dalje në treg në 2027
Zemra e Toyota GR GT është një motor krejtësisht i ri V8 twin-turbo 4.0 litra. Ai punon së bashku me një motor të vogël elektrik, i cili ndihmon në eliminimin e vonesës së turbinave dhe përmirëson reagimin e makinës në nisje dhe në dalje kthesash.
Transmetimi realizohet përmes një kambioje automatike me 8 marshe, që dërgon fuqinë vetëm te rrotat e pasme.
Toyota njofton se fuqia e GR GT arrin në 650 kuaj fuqi, ndërsa fuqia tërheqëse e motorit shkon në 850 Nm. Megjithatë, marka thekson se këto shifra i përkasin versionit para-prodhim dhe se modeli final mund të jetë edhe më i fuqishëm.
E njëjta gjë vlen edhe për shpejtësinë maksimale. Aktualisht Toyota flet për mbi 320 km/h, por modeli përfundimtar mund ta kalojë këtë shifër.
Toyota GR GT dhe versioni garues GR GT3 do të dalin në treg në vitin 2027. Më shumë detaje teknike, si edhe çmimet zyrtare, pritet të publikohen në periudhën në vijim.
Me GR GT, Toyota nuk po prezanton thjesht një model të ri sportiv. Ajo po tregon se Gazoo Racing është gati të hyjë në territorin e super-makinave, me një model që bashkon traditën, garat dhe teknologjinë moderne.